Os mellores días para catar (polo menos os nosos viños)

Esta é unha pregunta que me fan a miúdo. Tanto xente da rúa , como hostaleiros. Sobre todo preguntan por iso que poñemos detrás na contra do viño.

Refírome ao de día flor.

Pero tamén embotellado en día froita?, Que carallo é iso?

Pois moi fácil, no calendario biodinámico hai varios tipos de días, como contarei logo.

                Este é un calendario feito por María Thun, a señora da imaxe. 

Naceu no ano 1922  e dende hai moitos anos publica este calendario co seu fillo Matthias. Traballan xuntos investigando os efectos dos ciclos, a dinámica dos movementos dos planetas e costelacións. Ritmos, estacións da lúa e do sol para axudar nos calendarios das faenas agrícolas e o biodinámico.

A biodinámica é unha forma de agricultura baseada nas charlas que deu Rudolf Steiner en 1924. Steiner é o creador da antroposofía .

A biodinámica considerase hoxe en día a principal sistema de agricultura ecolóxica e a máis sostible. Mentres se permitan determinados compoñentes e hábitos en agricultura ecolóxica, esta será moi pouco ecolóxica e lóxica. Facer 20 tratamentos con cobre, non é nada ecolóxico, e utilizar 4 kilos de cobre en cada tratamento, é cando menos  perigoso. Por moi  natural que sexa o cobre e se atope na natureza, non deixa de ser un metal pesado como o chumbo. Ninguén trataría con chumbo ou arsénico os seus cultivos. Pois o cobre fai o mesmo efecto no chan. A cantidade de solos mortos ou saturados de cobre no mundo hoxe en día é moi alto. Sobre todo en zonas famosas de cultivo. Claude Bourguignon enxeñeiro e microbiólogo francés autor da famosa frase" hai máis vida nun metro cubico de terra dun deserto ca na maioría dos viñedos europeos" é determinante e fainos reflexionar. A agricultura hoxe en día esta nun punto morto. Os solos esgotados pola superprodución, degrádanse de forma irrecuperable para as próximas xeracións. Empeoran a calidade nutritiva dos alimentos e a nosa saúde. O trato os solos como materia inerte, lévanos sen remedio a fame e a desertizacións e ao abandono das zonas rurais, causando fame en xeracións de persoas. Nos que traballamos de forma sostible os nosos viñedos, traballamos na adega da mesma forma, seguindo o calendario biodinámico. Hai días flor, froita, raíz e folla, e logo uns días nos que os astros anda medio tolos en que e mellor non mover o viño.

Nos día flor movemos e embotellamos os brancos, para potenciar as súas características florais e os tintos en días froita.  Se queres potenciar o compoñente mineral embotellase en raíz e en días folla o compoñente vexetal.

Na cata pasa o mesmo, estaredes dicindo “vaia carallada nos esta a soltar o Sebio”

Pero supermercados como Tesco e Marks & Spencer na Inglaterra programan as súas catas para clientes nos días flor e froita. Tendas como Lavinia xa pensan en facer o mesmo. Eu ademais de utilizar o calendario teño unha aplicación no telefono. Atención a todos os fanáticos do Iphone, e para todos os que renegan de él e logo acaban entregados (como o noso MANUEL GAGO) ja,ja,ja.Vaille facer moita ilusión pois estiven facéndoo rabiar sen dicirlle cal era a aplicación.

Esta é a apps, entra no app Store e  pon WINE TONIGHT?

Eu utilízoa dende hai bastantes meses, sobre todo en cursos e catas na adega cando me esquezo de mirar o calendario.

Na contra figuran mais cousas como son o de viticultura sostible, non podes por ecolóxica ou biodinámica se non pagas o imposto revolucionario do Craega ou o de Demeter. Da igual que fagas as prácticas e estean  os viñedos inscritos nos consellos correspondentes. Ou pagas o tanto por cento do valor do viño estipulado ou non podes poñer nada. Xente como Nicolas Joly non leva a tirílla de Demeter a pesar de ser o gurú da biodinámica. Aquí pasa o mesmo, con Ricardo palacios no Bierzo. A asociación de biodinámica de España parécenme unha pandilla hippys trasnoitados que o fan polos cartos non polo espírito. Estiven nunha das charlas de Madrid nas que veu Nicolas joly nas que por certo, o firmarme o libro traducido por Ricardo palacios, quedouse co bolígrafo tan chulo que lle prestei, fíxome como o ministro ese manga-bolis. Agora teño unha anécdota chula para contar, ja,ja,ja. Pedímoslle a direccións duns produtores de preparados e negouse a dárnolas, pedíunolas a nós, e claro... xestionámosllo, levando iso si,  unha porcentaxe. Gran parte dos produtores de preparados non queren saber nada deles.

Tamén figura un debuxiño dunha árbore que é o símbolo de defensa do bosque mediterráneo, e dicir non solo sobreiras e a fauna e o medio. 

Ademais figuran o nome das fincas, as castes e o tipo de chan. Este ano sumamos tamén o código de barras para facilitar o control de stocks dos clientes, e o código QR que son ese cadradiños que o pasar o teléfono por arriba lévanos a páxina web ou blog que queira o adegueiro.

Nas caixas como sempre figura o día de embotellado. Ademais dende este ano as botellas de coto de Gomariz trocan.

O anterior fabricante pechou o que nos leva a ter que cambiar de modelo de botella. Isto provoca ter que trocar a caixa, botelleiros, pezas da máquina de embotellado e etiquetado. Co que ao final trocamos toda as botellas ao mesmo modelo, aínda que cambia o pescozo. No Gomariz conserva a clásica boca sen cápsula, aparello que eu detesto por molesto e contaminante,  nos tintos a mesma imaxe na boca.

Como algunhas colleitas xa estaban en botella iran saíndo o mercado pouco a pouco.

Posted in: biodinámica